الجمعة، نوفمبر ١٦، ٢٠٠٧

صراع لا محالة من حدوثه : أنا وبعض من أعرف 2





دائما وأبدا ً يكون النزاع والخلاف والخناق على شئ لا يستحق ، ومقولة معظم النار من مستصغر الشرر ، هى أدق وصف لكل حالات الخناق ، وقيل أيضا إذا عرف السبب بطل العجب ، والعجب والإستغراب هى السمة المميزة لكل حالات الخناق فهى فى نهاية الأمر أمور تافه . ه


ذكرت فى مقالى السابق بعض حالات الخناق بين الجيران وهى تافهة ولايتخيل احد حدوث مشكلات بهذا الشكل ، ولكن هذا بعض ما رأيته . ه


أما أنا فدائما تكون خناقاتى بسبب شئ واحد وإن شئت الدقه هما شيئان ، وهما مرتبطان ببعضهم البعض .ه


أولهما صوتى ، فقد أنعم الله على بنعمة إرتفاع الصوت ، فأنا لا أحدث الناس ولاكن أشخط فيهم ، ولا أطلب منهم ولاكن أمرهم .ه


والأمر الأخر هو أسلوبى فى الكلام ،فأسلوب وطريقة الكلام تشعر من يتحدث معى أننى كاره حديثه واجتماعه، ويشعر بانى أحدثه بإستعلاء وتكبر .ه


وهذان الأمران هما سبب أغلب مشاكلى . ه


ولاكنى أحاول قدر المستطاع أن أغير من طريقة كلامى ومن أرتفاع صوتى . ه


والله الموفق

الخميس، نوفمبر ٠٨، ٢٠٠٧

صراع لا محالة من حدوثه : أنا وبعض من أعرف



رغم إن العنوان عاجبنى وشكله شيك زى بتاع الكتب ، ولكن دى الحقيقه ، بعض من أعرفهم يحبون الخناقات يجدون فيه متعتهم ، إذا لم يتشاجروا ويعلوا صوتهم ويسبون هذا ويلعنون ذاك فإنهم يمرضون ، وكأنهم خلقوا للخناق ! ه


لى جار ـ سامحه الله ـ لا يستطيع النوم إلا لو جعل جيراننا يسبون ويلعنون اليوم الذى جاء فيه هذا الجار إلى هذا الشارع وجاءو هم فيه أيضا ً ، تحب تعرف ليه ، أقول لك ، تلكيك يامحترم على أى شئ ممكن يحصل خد عندك ، ابنه وابن أحد الجيران يتشاجران على شئ تافه وهذا الشئ لا يرقى بأى حال من الأحوال لأن يكون مصدر الخلاف والنزاع ولكن عقل الأطفال كما تعلمون فيتشاجران ، فيطلب الجار المسالم من الجار ـ اللى يكفيك شر أذيته ربنا ـ أن يبعد إبنه ، خلص الموضوع على كده ؟ إنت لسه شوفت حاجه ! ه


المؤذى :انت اللى تبعد ابنك عن ابنى لأن ابنك قليل الأدب


المسالم : ياعم كتر خيرك وبلاش قلة أدب


المؤذى : طب أنا كنت هاضرب أبنى بس كده أنا مش هاضربه


المسالم : طيب بس متخلهوش يلعب مع إبنى تانى


المؤذى : انت ياض إوعى تلعب مع العيال الوسخه تانى واللى يكلمك إديله بالجزمه


!!!!!!!!!!!!!!!!!!!!!!!


هذا قليل من كثير


....................................................


طبعا فاكرين خطبة السادات اللى علق فيها على أحداث الزاويه الحمراء وقال ( غسيل مواطن نقط على غسيل المواطن اللى تحته ......) ه


واحده من الجيران تتعمد لما تيجى تنشر إنها تنشر على غسيل اللى تحتيها ، مش مره ولا أثنين دى كل مره بتتعمد الموضوع ده!!!!!!!!!!ه


اللى تحتيها فكرت فى فكره ، بما إن المنشر مقسم لقسمين فإنها ستنشر فى إحدى الناحيتين وبكده تجبر اللى فوقيها على أنها تنشر فى الناحيه الثانيه ، فكره جهنميه ، لكن صاحبتنا اللى فوق ميرضهاش إنها تسعد اللى تحتيها فتنشر فى نفس الناحيه اللى منشور فيها ، تتعمد إغاظة جيرانها بطريقه غير عاديه ولكن ما الحل ؟


فكرت جارتنا فى فكره جهنميه أخرى وهى أن تنشر بعد أن تنشر اللى فوقيها ، فكره جهنميه خالص ، لكن اللى فوقيها مايرضهاش زى ما قلت من شويه إنها ترضى أو تسعد اللى تحتيها ، أصبحت بتغسل غسيل مغسول ولسه ما توسخش علشان تنشره على اللى تحتيها ، واحنا عارفين إن اللى تاحتيها نشرة بعد ما اللى فوقيها نشرت فا اللى فوقيها تلم الغسيل وتنشر غسيل غيره علشان ينقط على اللى تحتيها !!!!!!!!!!!!!!!ه


بقت بتحط كيس كبير علشان لما ينقط الغسيل ينقط على الكيس ، فكره جهنميه الشيطان مايعرفش يعملها ، بس اللى فوق الشيطان نفسه بيخاف منها وهى لو لقيته هتشاكل فيه ، اللى فوق بقت بتغسل حبل الغسيل بجردل ، السؤال الآن بتغسل الحبل علشان ينضف ؟ بالطبع لا علشان الميه اللى بتغسل بيها الحبل ينزل على الغسيل اللى تحتيها من بره ومن الأطراف !!!!!!!!!!!!!!!!ه


وعجزت اللى تحت عن إنها تجد حل يمنع مية اللى فوقيها إنها تنقط عليها .ه


ملحوظه : لم أذكر أنه فى كل مره كانت تقوم خناقه لرب السماء


أما أنا فلهذا حديث أخر.............ه




الأحد، نوفمبر ٠٤، ٢٠٠٧

24


بما أننا فى الوطن العربى لا نعرف مثل هذه المسلسلات التلفزيونيه الرائعه والمشوقه ، والتى تجعلك غير قادر على الذهاب بنظرك بعيد عن الشاشه ، ولا سماع أى شئ غير صوت التلفزيون . ه

عالم أخر تعيشه ، على مدار يوم كامل مفرق على أربع وعشرون ساعة ، تعيشها لحظة بلحظة ، مشاعر لا يمكن وصفها ،الحبكه الدرامية المدهشة ، وأداء الممثلين الرائع . ه

وأحب أن أشاهد الحلقه أكثر من فأنا لا أكل ولا أمل من مشاهدة مثل هذه المسلسلات الرائعه فدقة الإخراج والتصوير والإضاءه والديكور والتمثيل ، تجعل المشاهد منجذب لمثل هذه الأعمال، وهذا سر تفوق الأفلام والمسلسلات الأجنبية عن الأفلام والمسلسلات العربيه فالأعمال العربيه بالنسبه للأعمال الغربيه هى بمثابة النمله والفيل (وعليك أن تعرف من النمله ومن الفيل). ه


أدعوكم إلى مشاهدة (24) على قناة إم بى سى أكشن يوم السبت الساعه 8 مساءً ، فأنا عاجز عن وصف (24) فالمشاهده تغنى عن الوصف . ه